Madaxweynaha Uganda ayaa sheegay in waddankiisu aanu kala baxaynin ciidanka Somalia ka jooga qaraxyadii dhacay ka dib.
Taliyaha bilayska ee Waddanka Uganda Kale Kayihura ayaa sheegay in waxyaabahan qarxa oo Isniintii shalay ahayd laga helay xaafad ku taalla Magaalada Kampala ay muujinayaan in kooxaha xag jirka ah ee Al shabaab ay doonayeen in ay weeraro kale ka gaystaan Magaalada Kampala.
Af-hayeen Dawlada Uganda u hadlay oo la yiraahdo Fred Pololot ayaa isaguna shaaca ka qadday in ay dawlada wadankaasi ay soo qabqabatay dad lagu tuhunsan yahay in ay qaraxyadaasi ku lug lahaayeen, laakiin af- hayeenku wax tafaasiil ah kama uu bixinin itirada dadka la qabqabtay iyo cidda ay u kala dhasheenba.
Weerarkan oo ay sheegteen ururka Al Shabaab ayaa waxaa uu ahaa kii ugu horeeyay ee ay ka gaystaan waddan kale oo ka mid ah wadamada Somalia deriska ay yihiin.
Saraakiil ka tirsan Dawlada Uganda ayaa sheeggay in Intooda badan dadka ku dhintay weeraradaasi oo ay tiradoodu dhan tahay 76 qof ay u dhasheen dalka Uganda ee laakiin dadka kale ee ku geeriyoodayna ay ka mid yihiin dad u kala dhashay wadamada Ethiopia, Congo, India iyo Maraykanka iyo Irishka.
Bilayska Uganda ayaa baaritaanka lagu samaynayo qaraxyadaasi waxaa gacan ka siinaya dambi baarayaal ka socda dalka maraykanka, iyaga oo isku dayayaya in ay ka gun-gaaraan sidii qaraxyadaasi loo soo qorsheeyay iyo sisdii loo qarxiyayba.
Dalka Uganda ayaa waxaa laga bilaabay 7 maalmood oo dadkaasi loo baroordiiqayo, waxaana hoos loo dhigay calanka wadankaasi.
Madaxwaynaha wadanka Yuganda Youweri Muzaveni ayaa cambaareeyay weeraradaasi, waxaana uu sheegay, waa sida uu hadalka u dhigaye, in wadankiisu aanu ka carari doonin hawlaha ay ka wadaan Magaalada Muqadisho.